Namangy Sekoly roa ‘’Lycée privé NICOLETA’’ sy ‘’Lycée privé
NOBEL’’ izahay roa vavy ny 27 Febroary sy ny 07 Martsa 2013 teo. Nitafatafa
tamin’ny mpianatra kilasy famaranana izay teo anelanelan’ny 16-20 taona izahay.
Noresahanay tamin’izy ireo, voalohany, ny atao hoe WYLD, ny sehatra iasany
sy ny tanjona ijoroany. Sambany vao nahenoan’izy ireo , ary noezahinay
nampahafantarina azy ireo izany. Raha tao amin’ny Lycée NOBEL manokana ohatra,
dia tena liana tanteraka ireo mpianatra ary nanaiky sahady ny hiditra ho
mpikambana ao amin’ny WYLD rezionaly, miaraka amin’ny mpampianatra, ary
indrindra ny Tale ( par interim). Ireto farany moa dia samy nidera ny ezaka
ataon’ny WYLD ka sahy siteny hoe: “Ho tafita ihany i Madagasikara raha
maromaro ny tanora mandray andraikitra toa anareo ireto”.
Ny tao amin’ny Lycée NICOLETA indray
dia tsy latsa-danja koa satria nafana dia nafana ny adihevitra, ary naharitra
adiny roa be izao ny fihaonana. Liana dia liana ry zareo ary nisy tokoa ny
fifanakalozana teo aminay (fanontaniana avy any amin’ny zareo, valiny avy aty
aminay). Ny tsapa aloha dia toa mbola misafotofoto ao an-dohan’ireto tanora
ireto ny atao hoe demokrasia sy ny resaka fifidianana. “Tsy mirona amin’izany ny sainay
hoy izy ireo ary tsy mivaky loha amin’ny resaka pôlitika koa. Avelao ho an’ny
mpanao pôlitika izany”.
Somary
sarotsarotra ihany ny fandresen-dahatra (na tao amin’ny Lycée NOBEL io na tao
amin’ny Lycée NICOLETA) tamin’ny voalohany, sady somary bebe fanontaniana izay
ihany koa ry zareo. Ireto avy ny fanontaniana napetrak’izy ireo tamin’izany:
• Inona marina no
atao hoe Demokrasia?
• Inona no liana
ny Demokrasia?
• Misy eto
Madagasikara ve ny Demokrasia?
• Hisy fifidianana
Filoham-pirenena ihany ve eto Madagasikara amin’ity taona ity?
• Inona ny
voka-tsoa azo avy amin’ny fandehanana mifidy?, sns...
Ho an’ny
fanontaniana voalohany dia naverinay tamin-dry zareo ny fanontaniana ka samy
nanana ny fomba famaliny avy izy ireo ary saika mitovitovy avokoa. Ireto
misy sombintsombiny vitsivitsy:
> Victor sy
Eliza (TA, Lycée NOBEL) : “Ny
demokrasia dia fahefan’ny vahoaka’’
> Marie Joseph
(TD Lycée NOBEL) : “Fanehoan-kevitra
tsy misy teritery”
Nisy ihany koa
ireo fanontaniana somary nasiatsiaka, toy ny hoe : “Tsy manao pôlitika ianareo
nefa miresaka pôlitika?”-“Naninona no tsy nisy WYLD hatramin’izay fa izao vao
mody miforona satria mety misy tombontsoanareo manokana ao matoa efa akaiky
fifidianana ianareo vao mijoro?”
Tsy diso anjara
koa ny mpampianatra fa dia nandray anjara tamin’ny fametrahana fanontaniana, ka
isan’izany Mr Alain, Mpampianatra physique ny TA ao amin’ny Lycée Nobel : “Fa
maninona no nahemotra amin’ny 24 Jolay indray ny fifidianana?” Fanontaniana moa
izay tsy nahazoany valiny avy taty aminay satria tsy anjaran’ny WYLD no mamaly
izany fa ny CENI-T.
Na teo aza anefa
izany rehetra izany dia tsy kivy izahay roa vavy, tsy nikely soroka fa dia
nasehonay tokoa ny fahavononana nampita ny zavatra fantatray tamin’ireto zandry
ireto. Rehefa nohazavaina tamin’izy ireo anefa ny Demokrasia sy ny antony
tokony handehanana mifidy, ary nesorina tamin’izy ireo ny fisalasalana ka
noresena lahatra izy ireo, dia vonona ny handeha hifidy amin’ny fifidianana
hisy eto Madagasikara, ireo izay ampy taona. Vonona izy ny hampiseho ny zony sy
ny safidiny ary hampiseho ihany koa fa tanora mahay mandray andraikitra sy
adidy amin’ny fiainam-pirenena izay maha “olom-pirenena vanona” izy ireo.
Arak’izany dia
noezahinay novaliana arak’izay tratra ny fanontanian’izy ireo nampifanarahana
tamin’ny fiofanana izay voarainay teny Maibahoaka. Izany rehetra izany moa dia
niaraka tamin’ny fizarana ireo toro-lalana sy boky nosoratan’ny Liberty 32.
Efa natsidikay
sahady tamin’ireto tanora ireto ihany koa ny hananganana ny Ligy rezionaly WYLD
eto Boeny ary dia efa vonona ny amin’izany sahady izy ireo.
Nahafa-po anay roa
vavy ny fihaonana satria tsapanay dia tsapanay tokoa ny fahavononan’ireto
tanora ireto na dia mbola vao herotrerony aza, amin’ny fampanjakana ny
demokrasia amin’ny sehatra misy azy ireo tsirairay indrindra fa ny eto amin’ny
firenena.
Ankoatra ny
fitsidihanay ny sekoly, dia nisy ihany koa ny fitsidihana arapanajana nataonay
tao amin’ny «Inspection de travail» ka ny Tale Atoa BELAMY Rafidison mihitsy no
nandray an-tanana anay. Nivoitra tamin’io fitsidihana io fa dia liana dia liana
tokoa izy ary nidera ny ezaka ataon’ny WYLD. “Mahate-hidera ny ezaka
ataonareo, tanora vao herotrerony ianareo nefa efa sahy mandray andraikitra
lehibe sahady amin’ny fampandrosoana ny Firenenana” hoy izy taminay. Nankahery ny WYLD
ihany koa izy ary nofaranany tamin’ny hoe: “Ohatra tsara ho an’ny tanora
ato amin’ny Faritra Boeny ianareo“. Nanaiky avy hatrany amin’ny fiaraha-miasa
moa izy (fametrahana peta-drindrina, sns.) ary mbola nanamafy fa vonona ny
hanome tanana hatrany.
Amin’ny WYLD Voice
manaraka indray e!!
Juliana sy Léa
WYLD Boeny
WYLD VOICE n° 02 - Mars 2013
No comments:
Post a Comment