Anisan’ny paika hoentin’ny WYLD Analamanga hanentanana ny tanora sy ny vehivavy ny fanehoan-kevitra mahakasika ny demokrasia amin’ireo fitaovana fampitam-baovao toy ny haino aman-jery. Ny radion’ny tanora “Radio des Jeunes” na RDJ no nandray ireo solon-tenan’ny WYLD Analamanga ny zoma 22 martsa lasa teo tao amin’ny fandaharana «RDJ Chez vous», nitafatafana momba ny fahitan’ny tanora ny atao hoe demokrasia. Toy izao raha fintinina ny valan-dresaka nifanaovana tao.
Novelabelarina aloha ny antom-pisian’ny fikambanana WYLD izay adika amin’ny tena Malagasy hoe vehivavy sy tanora miasa hoan’ny demokrasia. Ary namafisina tamin’izany fa efa miparitaka amin’ireo faritra samihafa ny fikambanana ary anisan’izany rantsana izany ny faritra Analamanga. Hampitsiry ny fitiavan-tanindrazana amin’ireo tanora no tena imasoan’ny sampana Analamanga ankoatra ny fandraisany anjara amin’ny fanaraha-maso ny fifidianana izay anisan’ireo antoka voalohany hamantarana ny fisian’ny demokrasia amin’ny firenena na toerana iray.
Ahoana ny fandraisan’ny tanora ny atao hoe demokrasia tamin’ireo toerana sy fanentenana nataonareo?
Ny antsasa-aman’ilan’ny valim-panontaniana azon’ny mpikambana tao amin’ny WYLD Analamanga dia ny hoe demokrasia mira politika. Samy nanontaniana daholo tamin’izany na ireo ankizy avara-pianarana, izany hoe ireo mianatra na efa nahavita fianarana am-bony, na ireo vondrona tsy mba nandia ny sampam-pianarana ambony. Raha jerena ny fanazavana ny demokrasia araky ny voalazan’Atoa Abraham Lincoln dia: “Fanjakan’ny vahoaka amin’ny alalan’ny vahoaka sy hoan’ny vahoaka“. Izany hoe ny demokrasia dia firehana mampiseho fa ny vahoaka no tompon’ny fahefana rehetra ary izy no manome izany fahefana hananany izany amin’ireo izay nofidiny hisolon-tena azy mandritra ny fifidianana.
Anisan’ny andrin’ny demokrasia ny fanajana ny safidin’ny vitsy an’isa.Ahoana no hanajana io safidy io araka ny fanontaniana nipetraka satria mazàna io no mampisy ny disadisa eo amin’ny fiaraha-monina?
Mila jerena ny marimaritra iraisana hoy izahay ato amin’ny WYLD Analamanga. Tsy tokony ho terena hanaraka bontolo ny maro an’isa ireo vitsy an’isa fa hazavaina ny sain’izy ireo ary hezahina ny hahitana tokotany iraisana.
Ahoana no ahafahan’ny olona hiaina ny demokrasia izany nefa ny vahoaka aza hita fa noana?
Ny demokrasia dia anisan’ny fomba anankiray hametrahana ny rafi-piarahamonina ary izy io no mandamina ny singa rehetra ao amin’ny fiaraha-monina raha voahaja ireo hevitra rehetra fonosiny. Tsy resaka am-bava ny demokrasia fa hiainan’ny olona tsirairay satria mikasika ny andavanandrompiainana. Tsy mifanalavitra amin’ny soatoavina Malagasy ny fototra ijoroan’ny demokrasia raha ny fahitanay azy satria ny fanehoana hevitra dia atao eo am-panajana ny hevitry ny hafa sy ny sokajin-teny avoaka ny vava. Io no anisan’ny imasoan’ny WYLD Analamanga amin’ny asa tanterahiny satria mampianatra ny tanora hahay haneho hevitra sy hanohana ny heviny ny WYLD amin’ny alalan’ny fifaninanana DPO (Débat Parlementaire Ouvert) izy ohatra. Izany no atao dia ny mba tsy ho hanaovan’ny sasany amboletra izany heviny izany rehefa tonga ny fotoana hanehoany ny safidiny amin’ny fandatsaham-bato. Efa mitsoka ankehitriny ny rivotry ny fifidianana ka mahatsiaro manana adidy amin’ny mpiara-belona ny WYLD hanazava ny sain’ny vahoaka fa sarobidy ny safidiny ary tsy tokony ho voafehin’ireo mpanome fanomezana izany. Ho hazavaina amin’ny vahoaka
fa ny foto-drafitr’asa ara-piaraha-monina (projet de société), ireo mpanara-dia ilay olona ho fidiana ary ny loharanombolany no anisan’ny tokony ho jeren’ny mpifidy tsara alohan’ny hanehoany ny safidiny.
Nafana sy nahafinaritra tokoa ny resaka natao niaraka tamin’Atoa Sylvain Rafiadana-Ntsoa, mpanentana ny fandaharana «RDJ Chez vous», ary isaorana azy izany. Mbola ho betsaka ny tafatafa amin’ny haino aman-jery toy izao hotontosainay eto amin’ny WYLD Analamanga izao, ary hafaliana ho anay hatrany ny hitatitra izany aminareo.
Mankasitraka!
Miranto sy Francia
WYLD Analamanga
WYLD VOICE n° 02 - Mars 2013
No comments:
Post a Comment